Delaossa, Juancho Marqués, Huda eta Laura Sam batu zaizkio kartelari
2025eko irailaren 19an izanen da hitzordua, Iruñeko Navarra Arenan
EN VIVO jaialdia Iruñean izanen da, 2025eko irailaren 19an, Navarra Arenan. Kase.O kartelburuak musikaren industrian 30 urte bete dituela ospatuko du, Estatuko hip-hop panoramako artista ezagunez eta berriz inguratuta.
Kase.O artistak hiru hamarkadatik gorako musika-karrera bere zaleekin batera ospatzea du asmo, ahalik eta ospakizun onena eginda. Orain arteko bidearen errepasoa egiteko modu bat izanen da, lan berriaren ekoizpenean buru-belarri murgildu aurretik; aro baten amaiera eta aro berriaren hasiera. Hurrengo erronken aurrean, makina koipeztatzeko eta bere jarraitzaileen energiaz betetzeko modu bat, haien hutsune handi-handia sumatu ostean. Euskadin, Nafarroan, Kantabrian eta Errioxan ez du beste kontzerturik emanen, eta ikuskizun esklusibo eta errepikaezina ikusteko aukera eskasetako bat izanen da hau, sorpresaz beteriko showa prestatu baitu, nostalgiak bezainbesteko garrantzia izanik ospakizunak.
Gaurkoan, beste lau artista berri gehitu zaizkio jaialdiko kartelean. Delaossa: Estatuko hip-hop panoramako talentu handienetako bat da, eta urte gutxi behar izan ditu promesa izatetik espainieraz abestutako musika urbanoaren errealitate irmo izatera igarotzeko. Juancho Marqués: protagonista handietako bat izanik bai jaialdietan bai plataforma digitaletan, hilean 400.000 entzule baino gehiago izaten ditu Spotify plataforman eta 34 milioi ikustaldi baino gehiago YouTuben.
Huda: aintzat hartu beharreko talentua. Magrebtar jatorriko promesa gazteak hip-hop eta rap frantsesa ditu inspirazio-iturri, eta Madrilgo kultura Afrikako iparraldean dagoen herri txiki bateko kulturarekin partekatzen du; izan ere, bi leku horietako esperientziei, ideiei eta melodiei ahalik eta zuku handiena ateratzen baitie. Laura Sam: hasieran, errezitaldi eta lehiaketetan aurkezten zituen bere testuak eta, arian-arian, tokiko panoraman lekua aurkitzeaz gain, nazioko eta nazioarteko jaialdi ugaritara iristea lortu du, emanaldietan argi uzten baitu sekulako ahalmen eszenikoa duela.
Jaialdiko sarrerak webgune honetan erosten ahal dira: www.envivo-festival.com. Eta autobus-zerbitzua ere izanen da, herri hauetatik: Santander, Bilbo, Eibar, Zarautz, Arrasate, Beasain, Ordizia, Vitoria, Altsasu, Irun, Errenteria, Donostia, Logroño, Lizarra, Zaragoza eta Tutera.
